Nisin nash aji mihi wedi ishkwiyag keh pidigesidjigadek In the Post colony. Nisobon minigik eh kendimik ka ijiyehbik ka-ija ojisidjigadek dish, ka kinamagoziyatc, ogi mamowi wija-odimtamawan kidja ndinijamowatc kegoni, anishnaben Algonquins of Barriere lake First Nation mamowi Shiri Pasternak, Weshketc ogi-pi widokowan acitc ogi wijigabwetowan mitcikinabikowinin Barriere Lake, acitc kinamageh koni widokazo Toronto metropolitan Universitykinamageh-migwamik Criminology odja. Omizinigan kagi ojitok, nikwetimomagan eh-wi matcawatc kidja ojitowatc ke ija widokowajan odinishnabemyan kidja ponton-jan kegoni ka midjishkagwajin, eh ija tinikiyatc. Nisi-tibaganik kiwedinok nehkehnah odijehyok, 59 acres minigik ikwa-ni ka ija tijikehyatc, nogom Outaouais Region of Quebec ija kendagon. Anish-ihi misowatc midashe-acitc nishwasi midasi midasmodinah square kilometers oshmeash ikwa-ni odikiyaw.

2022 kagi kinamagoziyatc pejigon ka inehgiziyatc, ogi ndinjanawa adi eh ija madizinjan mitcikinabikowinin Barriere Lake anishnaben, adi ka ija pindowidiziyatc weshkitc nopimak nehkehnah, mamowi nigi paba ijaman kidja kijigabidimak kodigin eh-ijanagogan winiwa eh-ija widokowajan oda-anishnabehmiyan. Wibitc ki misha wedi apitc gotc ka-nda kijigabidimowatc Barriere Lake keh ija pidiksidowatc migwami-ni keh-ija kishka widokowajan oda-anishnabemiyan mamowi ogi nigishkwan ogonen kagi matsetok mamowi agonen kagi widokazitc wendi odja. Apitc ka pi-kiyodehyatc oma, ki-mizinadjigeyok ka kinamaziyatc odja kawi mizinsehtowatc, kidja wabidjigadek eh-ijanagok koni keh ijanagok nogom ka ija widokaginiyatc anishnabek koni keh ija pidiksijigadek nopimik aki kak. Google drive kiga ija mikan wedi keh mizinsek kidja n’dajamin wedi kagwe ojitcigadek mamowi nigan keh ijizinadimowatc mizinigani keh abidjitowatc apitc shoniani gwedehyatc.

Shesin wedi Towards Unsettling Syllabus ka ijinkadek, kidja mamowi widja odimtamidiyatc acitc kidja ojisidowatc koni kidja matctayatc kidja kijigabidimowatc koni ijinakotowatc odi ishkwiyak anishnebe-mowini kinamagehwin. Ishkwiyak ka nibik, ki ojitcigadeh kedja mizinsek, mitcikinabikowinik, Barriere Lake odja. Kidja mino mamowisik “To Translate” keh mizinsek, keh kishka kijigabidamin agonen keh kinamagowin, keh kendamin. Megwatc yedi “To Translate” keh wabidimowin oma, adi eh-todomwatc winwah wendik anishnabek, kidja anogonak acitc kidja abidinik oga kinamagehwinyah, o-tebwetimowiniyah, kidja kendimowatc adi winwah eh-odja tiniziyatc, Kagi matctananok kidja ojitcigadek yedi keh ija widokowaginiyatc anishnabek, mitcikinabikok Barriere Lake nehkehnah. Kidja ijiyodjagadek ima midinenjagan keh widokagotc anishnabe. Ozan agwa eh-tigok im migwamin kidja inabidak yedo odja, keh widokazitc, aji kagi kinamagozitc yeni odja, nopimik kidja ijiyodok kinamagehwini weni, inendimok kidja tigonik ima kidja gwedehyatc ashkwen kidja kishka atcigadek, eh ayamak kinwek kidja kishka pigosendjigehik tibi adi eh-ija ndendimik, ashkwen o-weni kidja kiska atowatc ogimanodagan otibakonigeh mizinigani kak.

Agwa eh pidiksik wakaganik kak nehkehnah, aji got mitcikinabikowinik, Barriere Lake akoziyo-gwamik animitcigehmigin wapishkiyek odja, ozam acitc eh widokowaginiyat anishnabek. Panima kigi kendananan kidka kibiskahak pigi, ozam nigi kagwe kijikaman eh widokaziyak, kidoja kweksehni Western knowledge keh dish Indigenous Knowledge, anmitcigoshi odanakonigewin keh dish anishnabe odanakonigewin. Kagi gweshtowak ninwek kidja widokaziyak, kegon kidja mino abijitowatc, kegoni keh abidjitowatc, megwatc eh kagwe ojisimidiziyatc koki ka niganiyatc. Nigi odapinanan keh ija minosehnik kidja kishka widokowack mitcikinabikowinik, Barriere Lake anishnabek kidja matsehtowatc kidja kishka widokowajan oda-anishnabemya. Mamowi gotc kidja inendimak kidja mizinsehtowak anishnabek eh ija anishnabeyotc, widokazomigan anishnabek kidja pizigwibidowatc odinakonigehwinya, atimowahik keh inabijitowatc agwa mankatc kidja apenimotc CCA.

Kiga kendan gotc yedi GoFundMe page ka ijinkadek mamowi ka kinonak mamowi Norman Matchewan, shimaginashesh mitcikinabikowinik odja Algonquins of Barriere Lake, mihi awedi ka niganikidak weni kidja kishtcigadehnik. Ki tibajimo, panima kidja atowatc kiyabitc shoniani kidja kishka matctawatc, anish nigan kida n’dendagozi keh ojitok adi keh ijanagonik. Ninwet eh ijagabwiyak, kagi kinamagoziyak, kidja kijigabidimowatc agoneni ka n’dendimowatc nitim kidja matcawatc mamowi kidja tibajidimak adi keh ija kishka widokowaginiyapin, kidja atek wekaginik.

Ka ishkwa tijikehyak ima nigomonashtagan Rapid Lake, nigi inendananan kinoweh kidja minosek ishpin kishka atowagiban keh n’dinjamak Google Drive ka ijinkadek, pinigotc ima ta-tigon awik winda kendik notc akoziyo-gwamikni, awik win tibinoweh odja koni agwendik gotch kawinda kendik weni. Mamowi gotc keh ija mikimin shonia mizinigan keh ija gwedewin, ishpin Norman pigidinik, nigi mizinssetonanan kidja nodimin Keekagin apitc ka ijak Rapid Lake, acitc nigi mishmanan mitcikinabikowinik eh animodamowatc kodik keh todomowatc kiyabitc kidja kishtowatc yeni. Kan nigi ayasinanan ima apitc ka ijak agonen miya keh todomak, nigi wikodendanan kidja tibajidimak akoziyo-gwam mamowi adi eh ija pidiksik, kidja nisistagok wewenda eh apitcha sinigik kidja matcwin wedi anishnabek ima odja.

Ninwek ka inendimak mamowi miyoseh Onen’tó:kon Healing Lodge, Lori Tarbell, nigi kendananan awik n’dinjotc, keh n’dendimin, koni agonen keh abijitowin keh nosiniyagadek, mamowi kidja mizinagadek wedi kina adi eh todimowatc kidja matctawatc weni akoziyo-gwamni, kidja widokowak nidinimowatc shoniani ogimanodagini kak, mamowi agwa mankatc ogimanodagini kak. Lori kagi pigidinigetc kewin keh nabwajigadenik, eh kenimak dish mitcikinabikowinik Barriere Lake wasik eh tijikehyatc odehna kak mamowi ka widokogwadjan tapishkot Shiri Pasternak, wesk kagi-pi wijigabwitowajan mitcikinabikowinin Barriere Lake, nigi inendimigonan kidja matsehtowak keh ija wabijigadek eh widokowak megwatc eh ojisidowak shoniani kidja pidigehmiganik mamowi kidja mizinsehtowatc onakwigehnanonik. Kida minoseh wedi mamowi, mitcikinabikowinik Barriere Lake mamowi ka widokogwajan mamowi kawinda kendimowatc notc adi eh ijanagok ojisidjigadek akoziyo-gwam, kidja wibitc mikimin, kidja wabidiyehwin, mamowi wi pigidinamin kegon kidja widokazowin ima Drive ka ijinkadek.

Yedi Barriere Lake Multipurpose Healing Centre Open-Access Google Drive kiga mikan kiga mikan ima ishkwiyak shonia eh gwedehnanok, keh odapinimin kidja mikimin kawi n’dendimin, kidja odapinitc awik keh widokotc, nogom eh ijanagok akoziyo-gwam mizinazowin kak, mamowi pigi ka mizinsek. Yedi user guide, kina ima kiga wabidan kagi atcagadek, mamowi keh todimin kidja abijitowin Drive. Nigi odapinanan Google’s Shared Drive kidja agonsik kina kagi ojitcigadek kidja kishka widokazowin odi wasik nigan, odja kozabijigini kak mamowi ki mideshidjigani kak. Norman Matchewan mamowi Shiri Pasternak kida minagini yendan Drive kidja kinenmajan, koni agwendik gotc kitiganini kan n’denimajan. Nida minendananan kina wedi keh mizinadek oma Google Drive, kida mino abijiyagini ishpin kodik anishnabek wi-abijitowatc, kawi ojitok kewinwa akoziyo-gwamni. Odikiya kak.

Anah ishkwa nisobok wedi In the Postcolony kibigadek, niga gwe ojisidonanan wedi odimtawin mitcikinabikowinik kagi matseh towatc, kidja ojisidowatc weni akoziyo-gwamni odikiya kak, kidja kinondiyak kiyabitc megwatcmah tijikomowatc weni kagi wapishkiyeh onisidimowajan.