Lisez en:
ᑐᖓᓱᒋᔅᓯ ᐊᖏᕐᕋᒧᑦ
ᑕᕐᕋᓕᒃ ᐹᑐᕆᑦᔾ ᐅᖃᐅᓪᓚᖃᑎᖃᖅᐳᖅ ᕋᕕᑯᒥᑦ ᐊᒻᒪᓗ ᐃᓚ ᑎᓐ ᐃᐊᓪᔭᓐᒥᑦ ᐱᔾᔪᒧᑎᖃᖅᓗᓂ ᐃᓄᐃᑦ ᐊᖏᕐᕋᖏᓐᓂᒃ ᐊᒻᒪᓗ ᓄᓇᖏᓐᓂᒃ ᐊᖏᕐᕋᖏᓐᓂᒃ
- ᕋᕕᑯ ᕈᐃᔾ
- ᐊᖏᕐᕋᒧᑦ ᐃᓕᖕᓄᑦ ᖃᓄᖅ ᑐᑭᖃᖅᐸ? ᐱᓕᕆᐊᕆᔭᑦᑎᓐᓄᑦ CCA-ᒧᑦ, ᑐᑭᓕᐅᖃᑦᑕᖅᑐᕗᑦ ᐃᒪᓐᓇ “ᐊᖏᕐᕋᐅᓕᖅᑐᒍ,” ᑐᑭᓕᐅᑦᑎᐊᖅᓯᒪᖅᑰᖏᑦᑑᒐᓗᐊᖅ, ᑕᐃᒪᓕ ᐱᓯᒪᒍᑦᑎᒍᑦ ᐃᓄᒃᑎᑐᑦ ᑕᐃᔭᐅᔾᔪᑎᖓ, ᖃᓄᕐᓕ ᐃᓕᖕᓄᑦ ᑐᑭᖃᖅᐸ?
- ᑕᕐᕋᓕᒃ ᐹᑐᕆᑦᔾ
- ᐄᓚᒃ, ᑐᑭᖃᖅᑐᖅ “ᐊᖏᕐᕋᐅᓕᖅᑐᒍᑦ,” ᓲᕐᓗ ᐊᐱᕆᒍᕕᑦ ᐃᒪᓐᓇ ᓇᒧᖓᐅᕕᑦ, ᐊᖏᕐᕋᐅᓕᖅᑐᒍᑦ. ᑕᐃᒪᓐᓇ ᐅᖃᕈᓐᓇᖅᐳᑎᑦ. ᑕᐃᒪᓕ ᐅᕙᓐᓄᑦ ᖃᓄᖅ ᑐᑭᖃᖅᐸ? ᐅᖃᐅᓯᖅ ᐊᖏᕐᕋᒧᑦ ᑐᖓᓇᖅᑐᒻᒪᕆᐊᓘᕗᖅ. ᐃᓱᒪᒋᔭᐅᖏᓐᓇᐅᔭᕆᕗᖅ ᐃᓄᖕᓄᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ: ᖃᓄᕐᓕ ᐊᖏᕐᕋᖅ ᑐᑭᖃᖅᐸ ᐊᖏᕐᕋᕐᓃᑎᓪᓗᑎᑦ ᐊᒻᒪᓗ ᐊᒃᑐᖅᑕᐅᓯᒪᐃᓐᓇᐅᔭᓕᖅᖢᓂ ᖃᓪᓗᓈᓄᑦ ᓄᓇᑐᖃᕆᖏᑕᒥᓄᑦ ᓄᓇᑖᕆᔭᐅᕙᓪᓕᐊᑐᐃᓐᓇᓕᖅᖢᑎᒃ?
- ᕋᕕᑯ ᕈᐃᔾᒥᑦ
- ᖃᓄᐃᒻᒪᓪᓕ ᐃᓕᖕᓄᑦ ᐱᒻᒪᕆᐅᖕᒪᑦ ᑖᓐᓇ ᓯᕗᓪᓕᖅ ᐃᓯᕐᕕᒋᔭᐃᑦ ᑐᖅᓲᒃ? ᓇᐃᒪᕕᑦ ᑭᓱᑐᐃᓐᓇᕐᒥᒃ ᐅᕙᓘᓐᓃᑦ ᐃᒃᐱᒋᔭᖃᖅᐱᑦ ᑖᓱᒧᖓ ᑐᖅᓲᖕᒧᑦ ᐃᕕᑦ ᐃᓱᒪᒋᓚᐅᖅᑕᕐᓅᑦ?
- ᑕᕐᕋᓕᒃ ᐸᑐᕆᑦᔾ
- ᐅᕙᓐᓄᓪᓕ, ᑐᖅᓲᖅ ᐃᓄᖕᓄᑦ ᐃᓯᕐᕕᐅᖕᒪᑦ ᐅᕙᑦᑎᓐᓄᑦ - ᓄᓇᖃᖅᑳᖅᓯᒪᔪᑦ ᑲᒪᔨᐅᖃᑕᐅᑦ ᑕᑯᔭᒐᖃᕐᕕᖕᒥᑦ ᐅᕙᑎᖓᑦ - ᑐᖓᓱᒃᑎᑕᐅᔪᑦ, ᐃᓯᖅᖢᑎᒃ ᑕᑯᔾᔮᕋᓱᒋᖏᑕᒥᓄᑦ ᐃᒡᓗᒥᑦ ᑖᔅᓱᒥᖓ ᑲᓇᑕᒥᑦ ᐃᒡᓗᒃᓴᓂ ᑎᑎᕋᐅᔭᖅᑎᓄᑦ.
ᐅᖃᕈᒪᖕᒥᔪᖓ ᑕᒪᒃᑯᐊ ᑐᖅᓲᑦ ᐱᒻᒪᕆᐊᓘᖕᒪᑕ ᐃᒡᓗᓄᑦ ᐅᑭᐅᖅᑕᖅᑐᒥᑦ. ᑕᒪᒃᑯᐊ ᐃᓄᐃᑦ ᐅᕙᓘᓐᓃᑦ ᓵᒦᑦ ᐃᒻᒥᓂᒃ ᐃᓕᑕᖅᓯᖁᓪᓗᒋᑦ ᑕᕙᓂ ᑐᖅᓲᖕᒥᑦ, ᑕᒪᒃᑯᓂᖓ ᐱᖁᑎᓂᒃ ᑐᖅᓲᓃᑦᑐᓂᒃ. ᑕᒪᕐᒥᑦᑎᐊᖅ ᑐᓲᓃᑦᑐᑦ ᐊᑐᖅᑐᒻᒪᕆᐊᓘᖕᒪᑕ, ᑭᓯᐊᓂᑦᑕᐅᖅ ᐃᖅᑲᐅᒪᓐᓇᕐᒪᑕ ᑕᒫᓃᑦᑐᖅ ᑐᖅᓲᒥᑦ: ᓇᑦᑏ ᐊᒥᖏᑦ ᓇᐃᒪᓪᓗᒋᑦ, ᑐᑦᑐᐃᓪᓗ ᐊᒥᖏᑦ, ᑐᖁᓐᓇᖅᑐᖅ - ᑭᓯᐊᓂᑦᑕᐅᖅ ᑕᐃᒪᓐᓇ ᓇᐃᒪᓐᓇᕐᒪᑦ. ᑕᐃᒪᓕ ᑭᓇᑐᐃᓐᓇᖅ ᐃᓯᕈᓂ ᓯᓚᒥᑦ ᐊᒻᒪᓗ ᓇᐃᒪᓐᓇᖅᖢᑎᒃ ᓯᑭᑑᒥᑦ, ᑕᐃᒪᓕ ᑕᐃᒪᓐᓇ ᓇᐃᒪᓪᓗᓂ ᐃᖢᕆᓐᓇᖅᑐᖅ. ᐊᖏᕐᕋᕆᒐᑦᑎᒍᑦ. - ᕋᕕᑯ ᕈᐃᔾ
- ᑕᐃᒪᓕ ᓴᓇᕙᓪᓕᐊᓪᓗᓯ ᑐᖅᓲᖕᒥᑦ, ᐅᖃᕈᓐᓇᖅᐲᑦ ᑲᒪᔨᐅᓪᓗᑎᑦ ᐱᓕᕆᐊᕆᖃᑦᑕᖅᑕᕐᓂᒃ ᑐᖅᓲᒥᑦ - ᐊᒻᒪᓗ ᐃᓂᒃᓴᓕᐅᖅᖢᑎᑦ, ᐱᒻᒪᕆᐊᓘᖕᒪᑦ ᐃᓕᖕᓄᑦ ᓴᓇᕙᒃᑕᑎᑦ?
- ᑕᕐᕋᓕ ᐸᑐᕆᑦᔾ
- ᓄᓇᖃᖅᑳᖅᓯᒪᔪᑦ ᓴᓇᐅᒐᓕᐅᖅᑏᑦ ᐊᒻᒪᓗ ᓄᓇᓕᖕᒥᐅᑕᐃᑦ ᑕᕗᖓᖁᕙᒃᑲ ᐱᐅᓯᕆᖏᑕᖏᑦᑎᑐᑦ ᐋᖅᑭᒃᑕᐅᓯᒪᔪᒥᒃ ᐅᕙᑦᑎᓐᓄ ᑐᖓᓇᖏᑦᑐᒻᒪᕆᐅᓚᐅᖅᓯᒪᔪᓂᒃ, ᐃᓯᖁᕙᒃᑲ ᐃᓄᐃᑦ ᐊᒻᒪᓗ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ. ᑕᐃᒪᓕ ᐱᓕᕆᖃᑕᐅᖃᑦᑕᓕᖅᖢᖓ, ᐃᓄᐃᑦ ᐃᓚᐅᖁᖃᑦᑕᖅᐸᒃᑲ ᐊᒻᒪᓗ ᐱᓕᕆᐊᒃᓴᓂᒃ ᐱᓕᕆᖃᑕᐅᖁᓪᓗᒋᑦ ᑕᒪᒃᑯᐊ ᐃᓄᐃᑦ ᐊᓯᖏᑦ. ᐃᓄᑑᖏᑦᑐᖓ: ᐊᒥᓱᑦ ᐃᓄᐃᑦ ᑕᐅᒪᓐᓇ ᐱᐅᓯᖃᕐᒪᑕ.
ᑕᕐᕋᓕᒃ ᐹᑐᕆᑦᔾ, 2022. Photograph © ᑕᕐᕋᓕᒃ ᐹᑐᕆᑦᔾ
- ᕋᕕᑯ ᕈᐃᔾ
- ᑖᓐᓇ ᐊᒥᓱᓂᒃ ᐱᔾᔪᑎᖃᓗᐊᕐᒪᑦ ᐅᖃᐅᓯᖃᖅᖢᑎᒃ ᐱᓪᓚᑦᑖᖑᔪᓂᒃ ᐃᒡᓗᓂᒃ: ᔨᕋᓂᒧ ᐃᓅᑎᐅᑉ ᐅᖃᐅᓯᕆᔭᖓ ᓲᕐᓗ ᐃᖅᑲᐅᒪᔭᖓᓂᒃ ᑎᑎᕋᐅᔭᖅᖢᓂᒋᓪᓗ ᐃᖃᓗᖕᓂ ᓄᑕᕋᐅᑎᓪᓗᒍ, ᐊᒻᒪᓗ ᐊᓯᓇᔭᐅᑉ ᐃᖅᑲᐅᒪᔭᖏᓐᓂᒃ ᑕᐃᔅᓱᒪᓂᑐᖃᖅ ᑐᐱᖃᖃᑦᑕᖅᑎᓪᓗᒋᑦ ᓲᕐᓗ ᐃᓚᖃᖅᓗᑎᒃ ᓄᓇᒥᑦ. ᑕᐃᒪᓕ ᓴᓇᔨᐅᓂᕐᒥᑦ ᐱᓕᕆᐊᕆᖃᑦᑕᖅᑕᕐᓄᑦ ᐱᔾᔪᑎᖃᖅᖢᑎᑦ ᐅᖃᐅᓯᖃᖅᐲᑦ ᖃᓄᖅ ᑐᑭᖃᖅᒪᖔᑦ ᐃᓂᒃᓴᓕᐅᕐᓂᕐᒥᒃ?
- ᑕᕐᕋᓕᒃ ᐸᑐᕆᑦᔾ
- ᓯᕗᓪᓕᖅᐹᒥᒃ ᐅᐱᒋᑦᑎᐊᖅᑕᒃᑲ ᑖᒃᑯᐊ ᔨᕌᓂᒧᑦ ᐊᒻᒪ ᐊᓯᓐᓇᔭᖅ ᖃᐅᔨᒪᑦᑎᐊᖅᑐᖓ ᐅᖃᐅᓯᕆᔭᖏᓐᓂᒃ ᐱᔾᔪᑎᒋᓪᓗᒍ ᐃᖃᓗᖕᓂᕐᒥᐅᑕᐅᓚᐅᖅᓯᒪᖕᒥᒐᒪ ᓄᑕᕋᐅᑎᓪᓗᖓ. ᑕᐃᒪᓐᓇᑦᑕᐅᖅ ᐃᒡᓗᖃᖃᑕᐅᓚᐅᖅᓯᒪᖕᒥᒐᒪ ᐱᒻᒪᕆᐊᓘᓚᐅᖅᓯᒪᖕᒥᔪᖅ ᓄᑕᕋᐅᑎᓪᓗᖓ. ᑕᐃᒪᓐᓇ ᑕᑯᓪᓗᓂ ᐃᖅᑲᐃᒪᔭᓐᓂᒃ ᐱᐅᒻᒪᕆᒃᑐᖅ - ᐅᕙᓐᓄᓪᓕ, ᐄᓛᒃ, ᑕᐃᒪᐃᒋᐊᖃᖅᑐᖅ. ᑕᐃᒪᓕ ᐃᓅᓯᕆᔭᕗᑦ ᐊᒻᒪᓗ ᓄᓇᖁᑎᒋᔭᕗᑦ ᐱᐅᒋᔭᐅᑦᑎᐊᖅᑐᖅ ᑕᐅᑐᒃᑕᐅᒋᐊᖃᖅᖢᓂᓗ.
- ᕋᕕᑯ ᕈᐃᔾ
- ᐅᖃᐅᓯᖃᕐᒥᒐᕕᑦ ᐊᔾᔨᒋᔭᐅᔪᒥᒃ ᑖᔅᓱᒧᖓ ᓛᑯᓗᒃ ᕕᓕᐊᒻᓴᓐ ᐸᑐᕆᒧᑦ. ᖃᓄᐃᒻᒪᓕ ᐱᒻᒪᕆᐅᕙ ᐃᓕᖕᓄᑦ ᐅᖃᓪᓚᖃᑎᖃᖅᖢᑎᑦ ᓛᑯᓗᖕᒧᑦ ᐊᒻᒪᓗ ᖃᓄᖅ ᐱᔪᒪᓚᐅᖅᐱᑦ ᐅᖃᓪᓚᖃᑎᒋᔪᒪᓪᓗᒍ ᑕᕙᓂ ᑕᑯᔭᒐᖃᕐᕕᖕᒥᑦ?
- ᑕᕐᕋᓕᒃ ᐸᑐᕆᑦᔾ
- ᑖᔅᓱᒪᓕ ᓛᑯᓘᑉ ᐃᓱᒪᒋᓚᐅᖅᑕᖓ. ᑕᐃᒪᓕ ᐅᐸᓚᐅᖅᑕᕗᑦ ᓛᑯᓗᒃ ᑎᑎᕋᓚᐅᖅᑎᓪᓗᒍ ᐱᖑᐊᕈᑎᒋᓂᐊᖅᑕᒥᓂᒃ - ᐊᑕᐅᓯᕐᒧᑦ ᐃᓄᖕᒧᑦ ᑎᑎᕋᓚᐅᖅᑕᖓ ᐱᖑᐊᕈᑕᐅᓂᐊᖅᖢᓂ ᓄᕙᖕᓇᕐᔪᐊᖅᑕᖃᖅᑎᓪᓗᒍ, ᐱᔾᔪᑎᖃᖅᖢᓂ ᐃᓄᐃᑦ ᐃᒡᓗᕐᔪᐊᖏᓐᓂᒃ ᐱᔾᔪᑎᖃᓗᐊᖅᖢᑎᒃ ᐃᒡᓗᕐᔪᐊᖃᖏᓗᐊᕐᓂᖏᓐᓂᒃ ᐊᒻᒪᓗ ᐊᒃᑐᖅᑕᐅᓯᒪᖢᐊᕐᓂᖏᓐᓂᒃ ᓄᓇᖃᖅᑳᖅᓯᒪᖏᑦᑐᓂᒃ ᖃᓪᓗᓈᓂᑦ. ᐅᖃᓪᓚᑎᒋᓪᓗᒍ ᖃᓄᐃᓐᓂᐊᕐᒪᖔᑦ, ᐃᓱᒪᒋᔭᖓᓂᒃ ᖃᐅᔨᑎᑕᐅᔪᒪᓪᓗᖓ, ᐅᖃᓚᐅᖅᑐᖅ ᐅᕙᓐᓄᑦ ᐅᖃᕈᒪᓂᕋᖅᖢᓂ. ᓛᑯᓗᒃ ᐱᓕᕆᖃᑦᑕᖅᑐᖅ ᐱᓕᕆᖃᑎᒌᖕᓂᕐᒥᑦ. ᐱᓕᕆᖃᑎᖃᐃᓐᓇᐅᔭᖅᑐᖅ ᐱᓕᕆᐊᒥᓂᒃ, ᐊᒻᒪᓗ ᓇᓗᓇᐃᑦᑎᐊᖅᓯᒪᐃᓐᓇᐅᔭᖅᖢᓂ, ᐊᒻᒪᓗ ᐱᓕᕆᖃᑎᒋᔭᖏᑦ ᐊᑭᓕᖅᑕᐅᑦᑎᐊᖃᑕᐅᖁᓪᓗᓂᒋᑦ ᐱᓕᕆᐊᒥᓄᑦ. ᑐᓂᓰᓐᓇᐅᔭᖅᑐᖅ ᐊᒻᒪᓗ ᐱᓕᕆᐊᒥᓂᒃ ᐱᓕᕆᖃᑎᖃᑦᑎᐊᖅᐸᒃᖢᓂ. ᐃᒃᐱᒋᔭᖃᖅᐸᒃᑐᖅ ᐱᓕᕆᐊᖓ ᑐᓐᓂᖁᓯᐊᖑᓂᖓᓂᒃ ᑕᐅᑐᒃᐸᒃᑐᓂᒃ ᐱᖑᐊᖅᑎᓪᓗᖑ.
- ᕋᕕᑯ ᕈᐃᔾ
- ᑕᐃᒪᓕ ᐱᓕᕆᐊᖃᕐᓂᖅᐱᑦ ᑲᒪᔨᐅᓪᓗᑎᑦ ᐊᓯᐊᒍᑦ, ᐊᓂᔾᔨᖑᐊᓂᒃ ᐱᓯᒪᖕᒥᒐᑦᑕ ᑕᕙᓃᑎᓪᓗᑎᑦ ᑕᑯᔭᒐᖃᕐᕕᖕᒥᑦ. ᖃᓄᕐᓕ ᐅᖃᐅᓯᕆᔪᓐᓇᖅᐱᐅᒃ ᐊᔾᔨᓕᐅᕆᔨᐅᓃᑦ, ᑕᒪᐃᓐᓂᒃ ᖃᓄᑐᐃᓐᓇᖅ ᐊᔾᔨᓕᐅᕆᖃᑦᑕᖅᑎᓪᓗᑎᑦ ᐊᒻᒪᓗ ᑖᓱᒧᖓ ᐱᓕᕆᐊᕆᔭᕐᓄᑦ?
- ᑕᕐᕋᓕᒃ ᐸᑐᕆᑦᔾ
- ᐅᒃᐱᕈᓱᒃᑐᖓ ᑕᒪᒃᑯᐊ ᐊᔾᔨᓕᐅᖅᐸᒃᑕᒃᑲ ᐅᑕᖅᑭᑐᐃᓐᓇᖅᑐᑦ ᓴᓇᐅᒐᓕᐅᖅᑎᓂᒃ ᐅᕙᓘᓐᓃᑦ ᐊᔾᔨᓕᐅᕆᔨᓂᒃ. ᐃᓄᐃᑦ ᓴᓇᖑᐊᖅᑏᑦ ᐅᖃᖅᐸᒃᑐᑦ ᐅᔭᖃᕈᕕᑦ ᓴᓇᖑᐊᕐᓂᐊᖅᑕᕐᓂᒃ, ᖃᐅᔨᔪᓐᓇᖅᑐᑎ ᖃᓄᐃᑦᑐᒥᒃ ᑖᓐᓇ ᐅᔭᕋ ᑭᓱᖑᐊᖑᔪᒪᓂᖓᓂᒃ. ᓈᓚᑦᑎᐊᕆᐊᖃᖅᑐᑎᑦ ᑖᓱᒧᖓ ᐅᔭᕋᕐᒧᑦ. ᐅᖃᕈᒪᖕᒥᔪᖓ ᐱᔾᔪᑎᒋᓪᓗᒍ ᐊᒥᓱᐊᓗᐃᑦ ᐃᓄᐃᑦ ᓴᓇᖑᐊᖅᑎᐅᔪᑦ ᐱᔾᔪᑎᖃᖅᐳᑦ ᑭᓇᑐᐃᓐᓇᖅ ᓴᓇᖑᐊᖅᑎᐅᔪᑦ ᓴᓇᑦᑎᐊᕈᓐᓇᕐᒪᑕ. ᑕᐃᒪᓐᓇ ᐃᓅᔾᔪᑎᖃᓲᖑᒐᑦᑕ ᑕᒫᓂ ᐊᔪᕐᓇᕈᔪᒃᑐᒦᑦ ᓄᓇᖃᖅᑎᓪᓗᑕ: ᐊᑐᕆᐊᖃᕋᑦᑕ ᑭᓱᑐᐃᓐᓇᕐᓂᒃ. ᑭᓯᐊᓂᑦᑕᐅᖅ ᐱᒻᒪᕆᒋᔭᕗᑦ ᐃᓕᖅᑯᓯᑐᖃᖅᐳᑦ ᐊᑐᖅᖢᒋᑦ.
ᐅᖃᓪᓚᖃᑎᖃᓚᐅᖅᐳᖓ ᐃᓄᖕᒥᒃ ᖃᓄᖅ ᓄᓇᖃᖅᑳᖅᓯᒪᖏᑦᑐᑦ ᓴᓇᐅᒐᓕᐅᖅᑎᐅᔪᑦ ᐅᖓᓯᒃᓯᕙᓪᓕᐊᓇᓱᖕᓂᖏᓐᓂᒃ ᐃᓂᖅᑎᕆᓂᐅᔪᒥᒃ ᐊᒻᒪᓗ - ᐅᖃᕈᒪᒋᓪᓗᖓ ᖃᓄᑐᐃᓐᓇᖅ ᐱᓕᕆᐊᕆᔭᑦᑎᓐᓂᒃ ᓄᓇᖃᖅᑳᖅᓯᒪᓪᓗᑕ ᓴᓇᖑᐊᖅᑎᐅᓪᓗᑕ ᐃᓄᓪᓗᑕᓘᓐᓃᑦ ᐱᔪᒪᓱᖑᖕᒥᒐᑦᑕ ᑭᑯᑐᐃᓐᓇᐃᖅ ᐱᓕᕆᐊᕆᔭᖏᓐᓂᒃ ᐱᓕᕆᖃᑕᐅᔪᒪᓪᓗᑕ - ᑕᐃᒪᓕ ᑕᐃᒪᓐᓇ ᐱᖃᑦᑕᖏᑦᑐᒍᑦ. ᐃᓱᒪᒋᓗᒍᓕ ᑖᓐᔭ ᑕᒑᖅ, ᖃᐅᔨᒪᔭᐅᑦᑎᐊᖅᑐᖅ ᑲᑕᔾᔭᖅᑎᐅᓪᓗᓂ, ᓴᓇᐅᒐᓕᐅᕐᕕᖕᒥᑦ ᐃᓕᓐᓂᐊᓚᐅᖅᓯᒪᔪᖅ, ᐊᒥᐊᕆᔨᑦᑎᐊᕚᓘᓐᓗᓂᓗ. ᑎᑎᕋᕈᒪᓕᓚᐅᖅᓯᒪᔪᖅ ᐅᓂᒃᑳᒥᒃ, ᓵᓚᒃᓴᓚᐅᖅᓯᒪᓪᓗᓂᓗ ᑎᑎᕋᖅᑕᒥᓄᑦ ᐅᓂᒃᑳᒥᒃ, ᐊᒻᒪᓗ ᐱᔾᔪᑎᒋᓪᓗᒍ ᓴᓇᔪᒪᓲᖑᓂᖓᓂᒃ; ᐱᖃᑦᑕᖅᑐᖅ ᓴᓇᓱᒪᔭᖓᓂᒃ ᑕᑯᔭᐅᔪᓐᓇᕐᓂᐊᖅᑐᒥᒃ.
ᑎᑎᕋᖃᑦᑕᓕᖅᑎᓪᓗᖓ ᑲᑎᒪᔾᔪᑕᐅᓂᐊᖅᑐᓂᒃ ᓯᕗᓪᓕᖅᐹᒥᒃ ᐅᖃᓲᖑᔪᖓ ᐃᓄᖕᓄᑦ, “ᐱᔪᓐᓇᖁᕙᔅᓯ ᑎᑎᕋᕈᓐᓇᖁᓪᓗᓯ ᖃᓄᑐᐃᓐᓇᖅ,” ᐱᔾᔪᑎᒋᓪᓗᒍ ᐃᓛᓐᓂᒃᑯᑦ ᐃᓄᐃᑦ ᑕᐃᒪᓐᓇ ᑐᓴᕈᒪᓲᖑᖕᒪᑕ. ᐱᔪᓐᓇᖅᑎᑕᐅᓲᖑᒻᒪᑕ ᓴᓇᔪᓐᓇᕐᓂᕐᒥᑦ. ᐱᐅᓂᖅᐹᒥᑦ ᓴᓇᔪᓐᓇᕆᐊᖃᕋᑦᑕ; ᖃᐅᔨᒪᔭᓗᐊᕆᐊᖃᖏᖢᑎᒡᓗ. ᑕᐃᒪᓐᓇ ᐱᑐᐃᓐᓇᕆᐊᖃᕋᑦᑕ.
ᑕᕐᕋᓕᒃ ᐹᑐᕆᑦᔾ, 2022. Photograph © ᑕᕐᕋᓕᒃ ᐹᑐᕆᑦᔾ
ᑕᕐᕋᓕᒃ ᐹᑐᕆᑦᔾ, 2022. Photograph © ᑕᕐᕋᓕᒃ ᐹᑐᕆᑦᔾ
- ᕋᕕᑯ ᕈᐃᔾ
- ᑕᐃᒪᓕ ᓈᓚᒃᐸᒃᖢᓂ ᐊᔾᔨᓕᐅᕆᔨᐅᓪᓗᓂ ᐊᒃᓱᐊᓗᒃ ᐱᐅᒻᒪᕆᖕᒪᑦ ᐊᒻᒪᓗ ᓴᖏᓂᖃᒻᒪᕆᒃᖢᓂ. ᐃᓱᒪᔪᖓᓕ ᖃᓄᖅ ᐃᓕᖕᓄᑦ ᑐᑭᖃᕐᒪᖔᑦ ᓈᓚᒃᖢᑎᑦ ᑕᒪᒃᑯᓂᖓ “ᐃᒋᑕᐅᓲᖑᔪᓂᒃ” - ᐊᑐᕐᓂᐊᖅᖢᒋᓪᓗ - ᐱᓗᐊᖅᑐᒥᒃ, ᐊᒻᒪᓗ ᖃᓄᖅ ᓈᓚᒍᓐᓇᕐᓂᕐᓂᒃ.
- ᑕᕐᕋᓕᒃ ᐸᑐᕆᑦᔾ
- ᐅᕙᓐᓄᓪᓕ, ᑐᑭᖃᖅᐳᖅ ᑭᓱᑐᐃᓐᓇᕐᒥᒃ ᐱᓯᒪᒍᒪ ᓴᓇᔪᓐᓇᕋᒃᑯ. ᐃᓄᒻᒪᕆᐅᓂᕐᒥᒃ ᑕᐃᒪᓐᓇ ᐱᒻᒪᕆᐅᑎᒋᖕᒪᑦ, ᐊᑐᕆᐊᖃᕋᑦᑕ ᐃᒋᑐᐃᓐᓇᖏᓪᓗᒋᑦ, ᐊᒻᒪᓗ ᑕᐃᒪ ᐃᓱᒪᔪᖓ ᐊᔾᔨᓕᐅᕆᔨᐅᓪᓗᖓ ᑕᐃᒪᓐᓇᑦᑕᐅᖅ ᐱᓯᒪᖕᒥᖕᒪᑦ. ᐊᑐᖅᐸᒃᑐᖓ ᐅᖄᓚᐅᑎᕋᓛᓐᓂᒃ, ᐊᒻᒪᓗ ᑕᐃᒪ ᐊᓯᒃᑲ ᐊᔾᔨᓕᐅᕆᔨᐅᔪᑦ ᑕᐃᒪᓐᓇ ᐱᐅᒃᓴᕋᔭᖏᑦᑎᐊᖅᑐᑦ, ᑭᓯᖃᓂᓕ ᐅᕙᓐᓄᑦ ᖃᓄᐃᑦᑐᑐᐃᓐᓇᕐᓂᒃ ᐊᔾᔨᓕᐅᕈᑎᓂᒃ ᐱᓯᒪᒍᒪ ᐱᐅᒻᒪᕆᖕᒪᑦ. ᓴᓇᐅᒐᓕᐊᕐᓂᒃ ᐱᐅᒃᓴᑦᑎᐊᕋᒪ ᐊᒻᒪᓗ ᑮᓇᐅᔭᓂᒃ ᐊᑐᖏᒃᑲᓗᐊᕈᒪ ᑕᐃᒪᓐᓇ ᐱᔪᓐᓇᑦᑎᐊᕋᑦᑕ. ᐅᖃᐅᓯᐅᔪᖅ, ᐱᐅᒋᒻᒪᕆᒃᑕᕋ ᑮᓇᐅᔭᓂᒃ ᐊᑐᕆᐊᖃᖏᓐᓇᑦᑕ ᑕᐃᒪᓐᓇ ᐊᔾᔨᓕᐅᕆᓗᓂ. ᐊᑐᕆᐊᖃᖏᒃᑭᕗᑎᑦ ᖃᕆᓴᐅᔭᓂ.
ᓯᕗᓪᓕᖅᐹᒥᒃ ᐅᖃᐅᓯᕐᒥᒃ ᐊᑐᖃᑦᑕᓕᓵᖅᖢᖓ, ᖁᕕᐊᓱᑦᑎᐊᓚᐅᖅᑐᖓ ᑎᑎᕋᕆᐊᖃᕌᖓᒪ ᖃᐅᔨᓕᓚᐅᖅᑐᖓ ᑎᑎᕋᖅᑎᓪᓗᖓ ᐊᑐᕐᓂᓐᓂᒃ ᐊᓕᓚᔪᑐᐃᓐᓇᑯᓗᖕᓂᒃ. ᐅᕙᓘᓐᓃᑦ ᐅᐊᓴᖅᑎᓪᓗᖓ, ᐊᑐᕆᐊᖃᖏᖢᖓ ᑎᑎᕋᐅᑎᓂᒃ. ᑕᐃᒪᑦᑕᐅᖅ ᓱᖓᐅᔭᐃᑦ ᐊᑐᖅᑕᐅᓲᖑᒋᕗᑦ. ᓴᓇᓚᐅᕆᕗᖓ ᑖᒃᑯᓄᖓ ᐱᓐᓇᓪ ᓯᑦᓂᒥᐅᑕᕐᓄᑦ ᐊᒻᒪᓗ ᑎᑎᕋᓚᐅᖅᐳᖓ ᖃᓄᐃᑦᑐᑐᐃᓐᓇᕐᓂᒃ ᐊᑐᖃᑦᑕᖅᖢᖓ ᓴᓇᖃᑦᑕᖅᑕᓐᓂᒃ, ᐃᓱᒪᖏᖢᖓᓗ ᖃᓄᖅ ᑕᐅᑐᒃᑐᑦ ᖃᓪᓗᓈᑦ ᐃᓱᒪᖃᕆᐊᒃᓴᖏᓐᓂᒃ, ᑭᓯᐊᓂᓕ ᐃᓄᐃᑦ ᐊᓯᒃᑲ ᐃᓱᒪᖁᓪᓗᒋᑦ ᑕᐅᕗᖓᕈᑎᒋᓚᐅᖅᑕᕋ ᐊᔅᑐᕋᐃᓕᒧᑦ ᓴᓇᓚᐅᖅᓯᒪᒐᒪ ᓱᖓᐅᔭᓂᒃ ᑭᒍᑎᒧᑦ ᑯᒃᑮᔭᐅᑎᒥᒃ ᐊᑐᖅᖢᖓ. ᑕᐃᒪᓕ ᑕᒪᓐᓇ ᐱᐅᒋᔭᐅᑦᑎᐊᓚᐅᖅᑐᖅ ᓴᓇᔭᕋ; ᐱᐅᒋᔭᐅᑦᑎᐊᖅᖢᓂ ᑕᑯᔭᒐᖃᕐᕕᖕᒧᐊᖅᑕᐅᓚᐅᖅᑐᖅ.
ᐊᔾᔨᓕᐅᖅᑕᓐᓄᓪᓕ, ᐊᔾᔨᓕᐅᖅᑕᒃᑲ ᐱᐅᑦᑎᐊᖃᑦᑕᕐᒪᑕ ᐱᐅᖏᑦᑑᒐᓗᐊᕐ ᐊᔾᔨᓕᐅᖅᑕᓐᓄᓪᓕ, ᐊᔾᔨᓕᐅᖅᑕᒃᑲ ᐱᐅᑦᑎᐊᖃᑦᑕᕐᒪᑕ ᐱᐅᖏᑦᑑᒐᓗᐊᕐᒦᓗᖓ. ᐃᓚᖏᑦ ᐊᔾᔨᓕᐅᖅᑕᒃᑲ ᐊᔾᔨᓕᐅᓚᐅᖅᑕᒃᑲ ᐃᓄᖕᓄᑦ ᐃᓚᖏᓐᓄᑦ ᐱᐅᒋᔭᐅᖏᑦᑐᒦᒃᑲᓗᐊᖅᖢᖓ. - ᕋᕕᑯ ᕈᐃᔾ
- ᖃᓄᕐᓕ ᐃᒋᑕᐅᓯᒪᔪᓂᒃ ᐅᖃᐅᓯᖃᕈᓐᓇᖅᐱᑦ?
- ᑕᕐᕋᓕᒃ ᐸᑐᕆᑦᔾ
- ᓈᒻᒪᖏᑦᑑᒐᓗᐊᖅ, ᑭᓯᐊᓂᓕ ᐃᓄᐃᑦ ᐊᒥᓱᑦ ᐃᓱᒪᓲᖑᖕᒪᑕ ᐱᔾᔪᑎᖃᖅᖢᑎᑦ ᓄᓇᒥᒃ ᐃᖏᑕᐅᓯᒪᓂᖓᓂᒃ. ᐱᓯᒪᒋᐊᖃᕋᑦᑎᒍᑦ ᐊᑐᕐᓗᑎᒍᓪᓗ. ᑕᒪᓐᓇ ᓱᓕᒻᒪᕆᒃᑐᖅ ᑕᐃᒪᓕ ᑕᒪᓐᓇ ᐃᓂᒋᔭᕗᑦ ᐱᐅᒐᓗᐊᖅᑎᓪᓗᒍ ᐊᒻᒪᓗ ᐊᓯᐅᑎᑦᑕᐃᓕᒪᒋᐊᖃᕋᑦᑎᒍᑦ. ᐱᓯᒪᒋᐊᖃᒻᒪᕆᒃᑲᑦᑎᒍᑦ ᑕᐅᑐᒃᓗᑎᒍᑦ, ᑕᐃᒪᓐᓇ ᑕᐅᑐᒋᐊᖃᕋᑦᑎᒍᑦ ᐃᓕᑕᕆᖏᓪᓗᖑᓕ ᐱᕐᔪᐊᖑᓂᖓᓂᒃ, ᑭᓯᐊᓂᓕ ᐸᖅᑭᑦᑎᐊᕆᐊᖃᕋᑦᑎᒍᑦ ᐊᒻᒪᓗ ᑲᒪᒋᑦᑎᐊᕐᓗᑎᒍᑦ. ᐃᒋᑕᐅᓯᒪᔪᑦ ᓲᕐᓗ ᑕᐅᑐᒃᑕᐅᓪᓗᓂ ᓯᓚᕐᔪᐊᕐᒥᐅᓄᑦ, ᐃᓂᒋᔭᐅᕗᑦ ᓲᕐᓗᐱᒻᒪᕆᐅᖏᓐᓂᖏᓐᓂᒃ. ᑕᐃᒪᓕ ᐱᒻᒪᕆᐅᓂᖏᓐᓂᒃ ᐱᓯᒪᑦᑎᐊᕆᐊᖃᕋᑦᑎᒍᑦ, ᑕᐃᒪᐃᖏᑉᐸᑦ ᐳᐃᒍᖅᑕᐅᑐᐃᓐᓇᕐᓂᐊᖅᑐᖅ. ᓱᕐᓗ ᒥᕐᖑᐃᖅᓯᕐᕕᒃ ᑕᐃᔭᐅᔾᔪᑎᖃᖅᑐᒃᓴᐅᕗᖅ ᐊᓯᐊᓂᒃ - ᖃᓄᕐᓕ ᑕᐃᔭᐅᕙ? ᑕᐃᓐᓇ ᐊᒃᕗᐊᑕᒦᑦᑐᖅ?
- ᕋᕕᑯ ᕈᐃᔾ
- ᑳᐸᑦ ᔅᑯᐃᕐᒥᑦ ᑕᐅᔭᐅᔪᖅ, ᐊᐃᑦᑖᖑᒐᓗᐊᖅ.
- ᑕᕐᕋᓕᒃ ᐸᑐᕆᑦᔾ
- ᑳᐸᑦ ᔅᑯᐃᕐ. ᓱᖃᐃᒻᒪ ᐳᐃᒍᖤᕋᒃᑯ. ᐅᑭᐅᓂᒃ ᐊᒥᓱᒻᒪᕆᐊᓗᖕᓂᑦ, ᑕᐃᓐᓇ ᒥᕐᖑᐃᖅᓯᕐᕕᒃ ᑭᓱᓚᐅᖏᑦᑐᖅ. ᓱᕐᓗ ᑐᖁᖓᓚᐅᖅᑐᖅ. ᒪᓐᑐᕆᐊᒥᑦ ᓄᓇᖃᓚᐅᖅᓯᒪᕗᖓ ᐅᑭᐅᓂᒃ ᐊᒥᓱᓂᒃ ᐊᒻᒪᓗ ᕿᑐᕐᖓᒃᑲ ᓄᑕᕋᕐᓄᑦ ᐊᓐᓂᐊᕐᕕᖕᒧᐊᕈᑎᕙᓚᐅᖅᓯᒪᕙᒃᑲ, ᐊᒻᒪᓗ ᓴᓇᕕᒐ ᕗᐃᔅᒪᐅᓐᑦᒦᓚᐅᖅᑐᖅ, ᐊᒻᒪᓗ ᑭᒃᑯᑐᐃᓐᓇᕐᓄᑦ ᑕᒪᓐᓇ ᓄᓇ ᓱᖁᑎᒋᔭᐅᓚᐅᖏᑦᑐᖅ. ᑕᐃᒪᓐᓇᑐᑦ ᑐᕐᕙᓪ ᔅᑯᐃ ᑕᒫᓃᑦᑐᖅ ᕿᑭᖅᑕᒦᑦᑐᑎᑐᑦ, ᐃᓂᒋᔭᐅᓚᐅᖅᑐᖅ ᐃᓄᖕᓄᑦ ᐃᖏᕐᕋᕕᐅᓪᓗᓂᓗ ᐅᑭᐅᖅᑕᖅᑐᒧᑦ ᑲᓇᖕᓇᒥᐅᓄᓪᓗ. ᑕᐃᒪᓕ ᖃᐅᔨᔪᒪᒃᑲᓐᓂᖅᐳᖓ ᖃᓄᐃᒻᒪᑦ ᐃᓄᖕᓄᑦ ᐃᓂᒋᔭᐅᓂᖓᓂᒃ.
ᑕᕐᕋᓕᒃ ᐹᑐᕆᑦᔾ, 2022. Photograph © ᑕᕐᕋᓕᒃ ᐹᑐᕆᑦᔾ
- ᐃᓚ ᑎᓐ ᐃᐊᓪᔨᓐ
- ᑕᐅᑐᒃᖢᖓ ᓯᕗᓂᒃᓴᒧᑦ, ᖃᓄᐃᒻᒪᓪᓕ ᐳᓛᖅᑐᖅ ᐅᕙᓘᓐᓃᑦ ᑕᐅᑐᒋᐊᖅᑐᖅᓯᒪᔪᑦ ᑭᓱᒥᒃ ᐱᔪᒪᕙᑦ ᐅᕙᓘᓐᓃᑦ ᑭᓱᒥᒃ ᐊᑐᖅᓯᔪᒪᕙᑦ ᑕᕗᖓᖅᖢᑎᒃ ᑕᑯᔭᒐᖃᕐᕕᖕᒧᑦ? ᑭᓲᕙᓕ ᐱᒻᒪᕆᐅᓂᖅᐹᖑᔪᖅ ᐱᔭᐅᔪᖅ?
- ᑕᕐᕋᓕ ᐸᑐᕆᑦᔾ
- ᐃᓄᖕᓄᓪᓕ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐃᒃᐱᒋᖁᕋᒃᑭᑦ ᐃᒪᓐᓇ, “ᐊᖏᕐᕋᖅᓯᒪᓕᖅᐳᖓ” ᐊᒻᒪᓗ ᐃᒃᐱᒍᓱᓲᖑᕗᖓ ᐃᒃᐱᒋᔭᖏᓐᓂᒃ. ᐊᓯᖏᓐᓄᓪᓕ, ᐅᑎᓲᖑᕗᖓ ᐊᐱᖅᑯᑎᒋᔭᐅᓚᐅᖅᒧᑦ ᑭᖑᓪᓕᕐᒧᑦ: ᑕᐃᒪᓕ ᑕᐅᑐᓲᖑᕗᖓ ᐊᒻᒪᓗ ᐃᓱᒋᒪᒋᕙᒃᖢᒋᑦ. ᐱᓕᕆᐊᓕᒫᓐᓄᓪᓕ, ᐅᖃᓪᓚᖃᑎᖃᕈᒪᓲᖑᕗᖓ. ᑭᓱᑐᐃᓐᓇᕐᓂᒃ ᐱᔾᔪᑎᖃᖅᖢᖓ. ᑕᐃᒪᓕ ᐊᔾᔨᓕᐅᖅᓯᒍᒪ ᓱᕐᓗ ᐊᖏᔪᐊᓗᖕᒥ ᐊᐳᑎᒥᑦ, ᐅᕙᓐᓄᓪᓕ ᐱᐅᒐᓗᐊᖅᖢᓂ ᑭᓯᐊᓂᓕ ᐊᖏᔪᐊᓗᖕᒥᑦ ᐊᐳᑎᒥᑦ ᑕᒫᓂᒋᐊᖃᖏᑦᑐᖅ. ᑕᑯᔭᐅᔪᖃᕈᓐᓇᖏᑦᑐᖅ ᑕᒪᓂ ᓄᓇᒃᑰᕈᑎᓄᑦ ᐃᓂᖏᔭᐅᔪᒥᒃ ᐊᖏᔪᐊᓗᖕᓂᒃ ᓲᕐᓗ ᐃᒡᓗᕐᔪᐊᑎᑐᑦ ᐊᒃᑎᒋᔪᓂᒃ. ᐃᓄᐃᓪᓕ ᑭᒃᑯᑐᐃᓐᓇᐃᑦ ᐃᒃᐱᒍᓱᖁᓱᕆᕙᒃᑲ ᑕᐃᒪᓐᓇ ᑕᕗᖓ ᐃᓯᕌᖓᑕ ᑕᑯᔭᒐᖃᕐᕕᖕᒧᑦ. ᖃᐅᔨᒪᖏᑦᑎᐊᕈᑎᒃ ᐅᑭᐅᖅᑕᖅᑐᒥᑦ, ᑕᕙ ᐅᑭᐅᖅᑕᖅᑐᖅ, ᐅᕙᓗᓐᓃᑦ ᐃᓚᐃᓐᓇᖓ. ᑕᕙ ᐅᑭᐅᖅᑕᖅᑐᒻᒪᕆᒃ.
- ᐃᓚ ᑎᓐ ᐃᐊᓪᔨᓐ
- ᑕᐃᒪᓕ ᐱᓕᕆᐊᕆᔭᔅᓯᓐᓂᒃ, ᑕᐅᑐᖕᓂᖃᖅᐳᒍ ᐃᓂᒃᓴᓕᐅᕐᕕᐅᔪᓂᒃ ᐊᒻᒪᓗ ᐃᓂᒃᓴᐃᑦ ᐃᓕᐅᖅᑲᕐᕕᖏᓐᓂᒃ, ᒪᑯᓂᖓᐅᖏᑦᑐᕐᓕ ᓴᓇᔭᐅᓲᖑᔪᓂᒃ ᖃᓄᐃᑦᑐᑐᐃᓐᓇᕐᓂᒃ. ᖃᓄᕐᓕ ᑕᐅᑐᖕᓂᖃᖅᐱᑦ ᐊᔾᔨᒋᔭᐅᖏᑦᑐᓂᒃ ᐃᓄᐃᑦ ᑕᐅᑐᒃᑕᖏᓐᓂ?
- ᑕᕐᕋᓕᒃ ᐸᑐᕆᑦᔾ
- ᑕᐅᑐᑦᑎᐊᖅᑕᕗᑦ ᓇᓂᑐᐃᓐᓇᖅ ᑕᑯᔪᓐᓇᖅᑕᕗᑦ - ᑕᐃᒪᓕ ᐱᔾᔪᑎᒋᔭᖃ ᒪᓐᑐᕆᐊ - ᐃᓄᐃᑦ ᐊᐅᓪᓚᖅᓯᒪᑎᓪᓗᒋᑦ ᓄᓇᑐᖃᕐᒥᓂᒃ, ᐱᓯᒪᓲᖑᕗᑦ ᑲᑎᓯᒪᑦᑎᐊᖅᖢᑎᒡᓗ. ᓇᓂᑐᐃᓐᓇᕐᒥᐅᑦ ᓄᓇᓕᕋᓛᖃᖅᑐᑦ ᑕᐃᒪᓐᓇ ᐱᓲᖑᕗᑦ, ᑭᓯᐊᓂᑦᑕᐅᖅ ᐃᓚᖏᑦ ᓂᕆᔭᖅᑐᕐᑯᐅᓲᑦ, ᐃᒥᐊᓗᒋᐊᖅᑐᕐᕖᓪᓗ, ᐃᓄᖕᓄᑦ ᐅᐸᒃᑕᐅᓲᖑᔪᑦ ᓇᓂᑐᐃᓐᓇᕐᒦᒃᑲᓗᐊᕈᑎᒃ ᖃᓪᓗᓈᑦ ᓄᓈᓃᑲᓗᐊᕈᑎᒡᓘᓐᓃᑦ ᐅᕙᓘᓐᓃᑦ ᐳᓛᑐᐃᓐᓇᖅᖢᑎᒃ. ᓇᓂᑐᐃᓐᓇᑦ ᐃᓄᐃᑦ ᐅᐸᒃᐸᒃᑕᖏᓐᓂ ᐃᖢᐊᕆᔭᖏᓐᓂᑦ ᐊᑦᑕᓇᖏᑦᑑᒥᓐᓂᖏᓐᓂᒃ ᓲᕐᓗ ᐊᖏᕐᕋᒥᓃᖢᑎᒃ ᓄᓇᓕᖕᒥᓂᒃ ᐊᒻᒪᓗ ᐃᓚᒥᓂᖢᑎᒃ. ᑕᒪᔾᔭ ᐅᖃᐅᓯᕆᔭᒃᑲ ᑐᑭᖃᖅᖢᑎᒃ “ᐃᒋᑕᐅᓯᒪᔪᑦ ᐃᓂᒃᓴᐃᑦ” ᑕᐃᒪᓕ ᑕᒫᓂᓗᐊᖃᑦᑕᖅᑐᒃᓴᐅᖏᓐᓇᑦᑕ, ᑭᓯᐊᓂᓕ ᐃᓄᐃᑦ ᓄᓇᓕᑦᑎᓐᓂᕐᒥᐅᑦ, ᑕᐃᒪᓐᓇ ᐱᓲᖑᕗᑦ ᖃᓂᒌᒃᐸᒃᖢᑕᓗ.
ᐅᑭᐅᖅᑕᖅᑐᒥᑦᑕᐅᖅ, ᐃᓂᒃᓴᓕᐅᕐᓂᖅ - ᐅᕙᓐᓄᑦ, ᐱᔾᔪᑎᖃᓗᐊᖅᐳᑦ ᐃᓄᐃᑦ ᐃᓂᒃᓴᓕᐅᕐᓂᖏᓐᓂᒃ. ᐱᒻᓚᓕᐊᓘᕗᖅ ᐃᓄᖕᓄᑦ ᐃᒻᒥᓂᒃ ᐱᓇᓱᒃᖢᑎᒃ, ᒐᕙᒪᓕᕆᑐᐃᓐᓇᖏᖢᑎᓗ, ᑭᓯᐊᓂᓕ ᖃᐅᑕᒫᑦ ᐃᓅᓂᕆᔭᖏᓐᓂᒃ, ᐃᓚᒋᖑᔪᓪᓗ, ᐱᓕᕆᕕᖏᓐᓂᒃ. ᑕᒪᒃᑯᐊ ᐃᓂᒋᔭᐅᔪᑦ ᐃᓄᖕᓄᑦ ᑕᐃᒪᐃᑦᑑᕗᑦ, ᖃᓄᐃᑦᑐᑐᐃᓐᓇᐃᑦ, ᐃᓄᖕᓄᑦ ᐱᒋᔭᐅᖕᒪᑕ. ᐊᒥᓱᐊᓗᐃᑦ ᐃᓄᐃᑦ ᑕᐃᒪᓐᓇ ᐃᓕᖅᑯᓯᖃᖅᑐᑦ.
